موضوع: لو مكتئب .. إعمل جراحة نفسية وركب شريحة سعادة وظبط مودك بالريموت كونترول الأحد ديسمبر 07, 2008 11:10 pm
جيب مرايا وبص لنفسك دلوقتى لاحظت إيه أكيد إن ما فيش ابتسامة على وشك وأكيد برضه إنت دلوقتى نفسك تدينى فى وشى وتقولى إبتسامة إيه فى النيلة إللى احنا فيها دى نضحك على إيه على خيبتنا .. الحقيقة عندك حق لأن معظم الشعب المصرى عنده اكتئاب وكلنا مخنوق .. وقبل ما تطلع زهقك عليا يا عم استحملنى لأنى عندى ليك حل عبقرى وخبر يفرحك سمعت فى برنامج أمريكانى اسمه abc news إنهم عملوا جراحة نفسية إزاى ؟ يعنى رزعوا شريحة تحت الجلد بجوار القلب واصلة لمنطقة معينة فى المخ المسئولة عن الشعور بالسعادة بعدين العملية بتخلص بعدها بيكون مع الدكتور النفسى ريموت كنترول بيه بيتحكم فى مود المريض ودرجة سعادته وبتتعمل الحكاية دى لمرضى الاكتئاب المزمن وجابوا حالتين فعلاً حياتهم اتغيرت تماماً ، تخيل كده لو معاك ريموت زى ده كنت تبقى سعيد على طول بدون أى سبب ولو مررت بلحظة حزن أو توتر تستعمل الريموت وقتها ها تبقى كوووول وتقدر تفكر بهدوء وأنت سعيد لكن الدنيا أسودت فى عنيا تانى لما حسبتها دى جراحة لسة جديدة وبتتعمل فى أمريكا بس يعنى تكلفتها حسبة كدة مرتب 100 سنة .. وفضلت أبرر لنفسى ـ زى ما المفروض إنت تعمل بالضبط إفرض الدكتور ماشى مع مراته أيام الجامعة والشقاوة ، يا نهار وقتها تبقى حوسة ، ده يخلى حياتك جحيم يعنى مثلاً تكون قاعدة فى عزا ويخليك تموت من الضحك فى وسط الناس أورئيسك فى الشغل بيكلمك فى حاجة مهمة وأنت قاعد تضحك أو حبيبتك قاعدة بتشكيلك من مشكلة ، هى واقعة فيها ودموعها نازلة ، وإنتميت على نفسك من الضحك ، ماقدامناش حاجة غير أننا نفترض كل ده لحد ما الجراحة دى تتعمل هنا وقتها نبدأ نفكر فيها لكن وقتها بقى أنت وحظك احتمال الدكتور يغلط أثناء الجراحة ويركبلك شريحة موبايل لعبة تفضل تهوهو طوال النهار .. وتبقى وقعة سودة يا معلم !
موضوع: لو مكتئب .. إعمل جراحة نفسية وركب شريحة سعادة وظبط مودك بالريموت كونترول 
