كن ظريفا... كن لذيذا
ترضـى عنك كوندزاليزا
كوندزاليزا بت ناشفـة
مفتريـة بالغريزة
حتـى لو لهدومها كاشفـة
مش ح تلقـى أي ميزة
وان في سوق النسوة نزلت
ما تساويش حتـى بريزة
*********
بس سبحانه له حكمـة
و انت ما عندكش فكرة
ان معزة تبقـى نجمـة
ليها حس و ليها ذكرى
حتـى لو باردة و رخمـة
أم ضب وخلقـة عكرة
ليها سكـة في كل أرض
وف كل حتـة ليها مجرى
*********
بس سوسـة في السياسـة
بالرواقـة والكياسـة
و التغني والتجني
والرخامـة والغلاسـة
و التأني والتمني
والبرادة و الحماسـة
نابها أزرق سمه ناقع
قلبها زي الكناسـة
*********
بس أرجل م الرجال
شوفها لما تيجي جولـة
تبقـى زي الاحتلال
واحنا عزبـة لسنا دولـة
الشناب تبقـى في حال
والركب تخبط علاولـة
عندها ما فيش محال
أو تجارب أو محاولـة
*********
قبل منها أبلـة رايس
كل واحد حاله هايص
بعد أول كلمـة منها
انتهت كل الهجايص
وابتدى الاصلاح و راحت
كل أيام النقايص
وأرض أمتنا العريقـة
أصبحت مسرح عرايس
*********
اللي في الدستور و عدّل
واللي في الأحوال و بدّل
واللي كان عنتر زمانه
تلتقيه ماشي مدلدل
واللي تنّـح و اللي سهّـم
واللي سلّـم و اللي بلّـم
واللي قال يا واقعـة سودة
واللي تلقـى وشه ضلّـم
المهم الحلوة ترضـى
حتـى لو تشبه لقردة
وآهي ماشيـة ف كل حتـة
ع الخلايق عاملـة فردة
*********
أصل مش بتحب سوريا
بالقانون رايحـة تحاسبها
لأ و مش عاجباها كوريا
راح تشوف حاجـة تناسبها
حالفـة مخلوقـة الكابوريا
من ايران تاخد نصيبها
أما اسرائيل يا سيدي
دي في حالها راح تسيبها
*********
الخبيثـة كوندزاليزا
عازمـة ان الأرض تركـة
من ايرلاندا لماليزا
كله خاضع للأميركا
و آدي بغداد العزيزة
أصبحت في الدم بركـة
والخلاصـة الوجيزة
كلنا في الذنب شركـة
*********
موضوع: علشان خاطر كوندزاليزا 