عزيزى المواطن بتاع النضال
يا راكب دماغك و غاوى الحلال
نصيحة يا صاحبى بلاش الخيال
و غمض عيونك و ربى العيال
بلاش المناكفة و لايم و عيش
هتتعب معانا و سهمك يطيش
نلفق لاهلك قضية حشيش
تصبح حكاية و نكتة و مثال
تعالى و هاودنا و عدى الأمور
و عيش فى الطراوة و خش الطابور
لكن لو هتزعل و دمك يفور
هنشهد نهايتك في بحر الرمال
هنحلف بان الحبايب شافوك
بتقبض يا خاين و تقتل اخوك
ساعتها مراتك هتلعن ابوك
و تلطم و تنعى احط الرجال
مالكش انت دعوة بايه اللى ضاع
ومين اللى شارى و مين اللى باع
و مين اللى كيل و مين اللى شال
فحب الحكومة و حب السلام
وعلم ولادك يشدوا الحزام
علشان بكرة يابا هياكلو الحمام
و ينسوا الآسية و ينسوا الهزال
فلازم يا صاحبي تغمض عينيك
و طنش علينا نطنش عليك
و إياك تشاور هنقطع ايديك
و تصبح مواطن ما يسواش ريال
عزيزى المواطن بتاع النضال
يا راكب دماغك و غاوى الحلال
نصيحة يا صاحبى بلاش الخيال
و غمض عيونك و ربى العيال
الحكومة الذكية
موضوع: رسالة حب من الحكومة لأبنها المواطن 