عجوز ....... بس خطيرة
عجوز ....... بس خطيرة
كان يا ما كان في قديم الزمان … كان فيه امرأة عجوز قاعدة بروحها .
وفجأة طلع لها إبليس … العجوز خافت وسمت بالرحمن .
قالها إبليس : أنتي يا عجوز هل تعتبرين نفسك داهية ؟؟؟؟
العجوز : نعم أنا داهية … والنساء عموما كيدهنّ عظيم .
إبليس : أنا أتحداك … وبنشوف مين كيده أعظم … المرأة ولا إبليس
العجوز : خلاص أنا بسوي مشكلة ، وأنت راح تحلها وإذا ما قدرت أنا راح أحلها
وراح أفوز برهان .
بليس قال ok : .
راحت العجوز حق واحد من هالبطالية اللي ما عندهم شغل ويا كثرهم .
وقالت له : أنا بشغلك عندي فترة معينة بس ، إذا أنت تبي فلوس لا تتدخل
ولا تتكلم ... وافق الشاب لأنه طفش من البطالة ومحتاج فلوس .
راحت العجوز ومعاها الشاب لمحل قماش وقالت له انتظرني عند باب
المحل … دخلت المحل ... وأخذت قماش غالي وراحت تكاسر تاجر القماش .
العجوز : رخص يا بن الحلال .
التاجر : إذا أنتي ما عندك فلوس أخذي شيء أرخص .
العجوز : ما أقدر … لازم ولا يصير شيء ما صار .
التاجر : ليش ؟؟ … إلى هالدرجة … والشسالفة ؟؟
العجوز : شفت الشاب اللي واقف عند باب المحل … هذا ولدي يحب له وحده
متزوجة وهي تحبه ولما تتطلق من زوجها … ولدي بيتزوجها .
وهو قالي أن عارضتي عن الزواج بأطردك من البيت وأمرني أني أشتري قماش غالي
عشان يعطيها حبيبته ولا راح يطردني من البيت مع أن البيت بالأساس بيتي
و لكني غلطت وكتبته بأسمه
التاجر : خلاص هونيها وتهون والله كسرتي خاطري … خلاص أنا بأعطيك
القماش ببلاش … وعسى الله يؤجرني .
العجوز طلعت مستانسه وقالت حق الشاب روح البيت .
بعدها راحت العجوز لبيت زوجة تاجر القماش وطقت الباب وطلعت الزوجة .
العجوز : آه يا بنيتي أنا تعبت بالطريق و ما أقدر أكمل ممكن أقعد عندك أرتاح
خمس دقايق رحبت الزوجة ودخلتها وأكرمتها و جابتلها شاي .
العجوز : مشكوووووورة ما تقصرين إن شاء الله أردها لك ( تعمدت تنسى
القماش) وطلعت .
الزوجة : حرام نست قطعة القماش … أكيد بترجع بعد شوي وتأخذها بروح
أحطها بالدولاب .
تاجر القماش رد لبيته وتغدى ذاك الغدا السنع ونام شوي .
قام العصر وفتح الدولاب بغير ملابسه عشان يروح محله … مفاجأة قطعة
القماش … وعرف أن المرأة اللي يبيها ولد العجوز هي زوجته يعني تخونه .
قام عليها وطقها وطردها بالشارع بالهدوم اللي عليها .
العجوز كانت تنتظر هاللحظة في أخر الشارع فراحت لها تركض .
العجوز : وش فيك يا بنيتي ليش تبكين؟؟؟
الزوجة : زوجي طردني … وما عطاني فرصه أتكلم .
العجوز : خلاص أنا باوديك بيتي وأنا بروح أحل المشكلة .
راحت العجوز لبيتها ودخلت الزوجة في غرفة بينما الشاب كان في غرفه ثانية
وأمرته أنه ما يطلع منها .
راحت العجوز للشرطة تبكي وتقول : كنت قاعدة في بيتي وفجأة دخل رجل ومعه
مرأة وقعدوا ببيتي حاولت أطلعهم ما قدرت ( احتلوا بيتي ) .
ذهبت الشرطة وقبضت على الشاب والزوجة … وحطوهم بالسجن .
العجوز : ها ها وش رأيك يا إبليس ؟؟ دورك أللحين في حل المشكلة .
إبليس : لا لا ما أقدر أحلها السالفة تشربكت مرررررررة .
العجوز : أنا راح أحلها وكأن شيء لم يكن . وراح أربح الرهان .
راحت العجوز تزور الزوجة بالسجن وقالت لها : أنتي ساعدتيني مرة .
وأنا أللحين بساعدك … يلا ألبسي عباتي وغطي نفسك وأطلعي من السجن كأنك
أنا وأنا بجلس مكانك .
الزوجة : مشكووورة … لكن أنتي ؟؟؟
العجوز : مالك شغل فيني مثل ما طلعتك بطلع نفسي .
تمت عملية الهروب بنجاح .
الوالي أمر الحراس يحضرون المسجونين عشان يحكم عليهم
حضرت العجوز والشاب وقال لهم الوالي : ليش قابضين عليكم وشو مسوين؟؟
ردت العجوز : إحنا ما سوينا شيء كنا قاعدين ببيتنا أنا وولدي ولا الشرطة طابة
علينا وماخذينا السجن .
عصب الوالي وهزأ الشرطة وما عطاهم فرصة يتكلمون ويقول : غلطانين وتبون
تتكلمون شين و قوات عين .
طلعت العجوز من الوالي مستانسه وعطت الشاب فلوس وأنهت خدمته عندها .
راحت العجوز لتاجر القماش وقالت له أنها تعبت بالطريق وأن زوجته أصيله
وأكرمتها وهي من كثر التعب نست القماش عندها وأن زوجته بريئة .
وقالت خذ قماشتك لأن ولدي سافر هو و زوجته الجديدة .
رجع التاجر زوجته وتأسف منها و راضاها بعد .
العجوز : وش رايك يا إبليس أنا فككت السالفة بكل سهوله وذكاء .
إبليس : أنتي ربحتي … ان كيدكنّ عظيم .
أنحاش إبليس وهو خايف منها .
.....
موضوع: عجوز ....... بس خطيرة 