صباح الفل على الكل
القصة دى لاقيتها فى ورقه ملفوف فيها الطعمية الصبح وعجبنى السجع فيها
وقولت لازم أخليكوا تقروها كلكوا عشان تنعنشوا وشيه وتكبروا الجمجمه.
وإللى بيحب يعقل ويهدى شويه ماحدش واخد منها حاجة
أسيبكوا مع نص الكلام بقه على راحتكوا
دى حكايتى انا .. حكايه الحبيب الأهبل والعبيط
ححكيهالكم بس متتريقوش .. وأرجوكم أسمعوها بس متضحكوش
الحكايه انى حبيت واتنيلت
وعلى جدور رقبتى وقعت واتبهدلت
احترت ازاى اوصفلها حبى .. واحكيلها ع النار اللى أيده ف قلبى
وقررت فى النهايه انى اكتبلها جواب... وبدأت جوابى
حبيبتى أيوه بحبك وانتى مش عارفه
وحاولت ألمح وأشرح برضه مش فاهمه
ليه عشان انتى غبيه ......
أيوه غبيه عشان مش واخده بالك من أى حنيه
الحنيه اللى طالعه من عينيه .. أكيد وراها معانى مستخبيه
طب أعملك ايه عشان تحسى اللى بيه
أجى وأقولك ف وشك بحبك .... عشان تقولى جتك رزيه
أو تقولى بحب غيرك .... أمشى وأقول يا خيبتى القويه
سوقت عليكى القريب والبعيد بس منفعش
حاولوا يلمحولك ويسألوكى ايه رأيه فيا .. قولتى معرفش
أعمل ايه ؟ أصوت وأقول بحب غبيه مبتفهمش
المهم انى قررت أعمل خطوه ايجابيه
وف قصيده عاطفيه ححكيلك وأقولك ع اللى بيه
القصيده عنوانها بحبك....
يابت بحبك والنبى بحبك وحياه الأخوه بحبك
قد أكياس الزباله اللى ف شوارع بلادنا بحبك
قد الحشرات اللى فى دماغ حماده بحبك .. صدقينى بحبك
حاولت أهرب من حبك مقدرتش
حاولت أقولك بحبك معرفتش
أقولك انى ف بحر حبك اترميت بس مغرقتش
وبرغم تقلك عليه برضه مزهقتش
دا حبك ف قلبى زى البطاطس ف الزيت بتعمل .. تش تش
حسى على دمك وحبينى .. وكفايه بقى تلوعينى
انا جالى السكر والضغط .. تعبتينى
ومش حترتاحى غير لما تموتينى ... ارحمينى
وخلصت الجواب وقفلت الظرف
وف أجنده محاضراتها حتطلها المظروف
وقلبى قعد يدق من شده الخوف
واستنيت الرد الموعود من فاتنتى الودود
وبعد ساعه لقيتها جايه من بعيد
عينيها كانت بتضحك ووشها كان سعيد
وقربت منى بكل حنيه وقالتلى برقه غير عاديه ونظره شوق عاطفيه
عايز منى ايه يا مهووس .. انا احبك انت يا منحوس
وشتمتنى بكل شتايم الدنيا وسابتنى ومشيت
وبكل رجوليه كسرت وراها قوله مايه
قولتلها غورى يبتليكى بمصيبه حلوه ومتنقيه
وواحد بخيبته يوديكى العباسيه
ويزورك قسم تانى وأول يا مفتريه
ساعتها روحت بيتى ونمت على سريرى
وقعدت أفكر فى حالى ومصيرى
وقولت ها ياعم الحلوف .. حتفضل كده ع الحب ملهوف
أديك جربت وشوفت ودوقت مرار الحب
وعرفت ساعتها وقررت ان يكون ليا مبدأ أو شعار
ان الحبيبه هى السايس والحبيب هو الحمار
وأنا مش عايز اعيش حمار
أنا مش عايز أعيش حمار
............
أتمنى تعجبكم
منقول
_
موضوع: حب اهبل....... 