ساعات
أنا وروحى نتخانق
ونعلق لبعض المشانق
وضرب وشد
حاجة بجد
تزعل أوى وتضايق
لحد ما ننزف
لحد ما ننزف
ونضعف
ونفهم
ونعرف
ونحس بنعمة الحب
ونشكر الخالق
يارب
ياخالق القلب طاهر برئ
ارزقنى نور الطريق
واكفينى شر اللف والدوران
والحيرة عند المفارق
نفسى أوى فى ساعة رضا
تعبنا ياقلبى من الجرى
كفاية كده
سهل السؤال
لكنه صعب وتقيل
صحيح مفيش حل
لكن كمان
مفيش بديل
عايز أشترى دماغى
وزى ما تميل أميل أقول للحلاق
خف الجناب
وخللى قدام طويل
وأطلع البنطلون الجينز
والقميص المقلم
وأشرب بدل الشاى
قرفة بالجنزبيل
وأتمشى ع الكورنيش
يمكن عيونى
تقدر تشوف النيل
كان عندى أصاب
فى المدرسة
والجيش
صلاح ويوسف
ومصطفى ونبيل
لكن لما اتصلت بصلاح
وقالولى عقبال أملتك
ده راح وعايش ومتجوز
ومبسوط ف اسرائيل
ساعتها بس حسيت
إن الحمل لسه تقيل
رميت البنطلون الجينز
والقميص المقلم
ورجعت من تانى
أنا وروحى نتخانق
موضوع: القميص المقلم 