admin
«.¸¸.•°°مدير المنتدى·.¸.•°®»
عدد الرسائل : 2958
تاريخ التسجيل : 07/08/2008
 |  موضوع: سلسة حقك وواجبك الجزء الثانى (حبس 24 ساعة تحرى) الأحد أغسطس 29, 2010 2:15 pm | |
| حبس 24 ساعه تحرى السلام عليكم ورحمه الله وبركاتهبعد عرضنا لأول جزء من سلسلة حقك وواجبك بعون الله وتوفيقة نطلعكم على الجزء الثانى من تلك السلسة راجيا من الله أن ينتفع بها الجميع المشكلة الحقيقية التى يراها جميعنا يوميا ........ أسف يا جماعة نرجع لاسلوب الموضوع السابقبصم يا جماعة كل
يوم بنشوف الكلمة دى ممكن يكون ظابط أو أمين شرطة بيقولها لواحد انا من حقى
أخدك تحرى 24 ساعة وأقبض عليك عما أعمل عنك تحريات أصل أنا مشتبة فيك
وشكلك عليك أحكام وياخدوا على القسم يخليه يبات 24 ساعه وزى ما إحنا طبعا
عارفين قله أدب وسفاله وضرب ومهانه والذى منه القفا بياخد تمام والمخبرين (
زبانية جهنم ) شغالين طول الليل تسالى بقا ( بدل اللب والسودانى ) المهم
تلاقى نفسك بقيت ملطشة لكل الموجودين فى القسم زى ما بنشوف فى فيديوهات
التعذيب المهم ...تعالوا بينا نعرف
فى الموضوع دة هل من حق الظابط أو الامين ياخدك تحرى ؟ طيب لو وقفك فى لجنة
هيعمل معاك ايه ؟ ايه كل الاجراءات الل هيعملها معاك ؟ وامته ممكن ياخدك
معاه ؟ إن شاء الله بعونة وتوفيقه سوف نعرف كل تلك المعلومات بل وزياده فى
تلك السلسلة .نبدأ بعون الله تعالوا بينا بقا نعرف يعنى ايه يوقفوك تحرى ؟ وياخدوك تحرى ؟بصم يا جماعة أول
نقطة لازم نعرفها مفيش حاجة أسمها تحرى ( مفاجأة طبعا ) دى حاجة اسمها إن
انسان حط نفسه موضوع شك وريبه وهنشرح يعنى ايه شك وريبة بس فى مكانها طيب يعنى ايه توقيف تحرى زى ما بيقولوها ؟ بصم يا جماعة فى
حاجة فى القانون أسمه الاستيقاف تمام لما الانسان يحط نفسه موضوع شك وريبة
يعنى ايه شك وريبة يعنى تخلى الشخص الطبيعى ممكن يشك فيك إزاى يعنى شوفت
الظابط قدامك كأنك شوفت عفريت وأخدت ديلك فى سنانك ويافكيك ماشى بالليل
مثلا وهدومك معكوكة دم شايل فى ايدك أجهزة كهربائية وماشى فى وسط محلات
وبتتلفت شمال ويمين ماشى وفى ايدك سيجارة شكلها كبير ( محشية يعنى ) ماشى
تلعب فى كوالين العربيات أو اقفال المحلات أو شايل فى ايدك سلاح أو ماشى
بتتطوح أو ماشى مع واحدة فى منظر مش كويس فى وقت متأخر كدة انت حطيت نفسك
موضوع الشك والريبة إنما الظابط من حقه يسألك على البطاقة وانت مين وشغال
ايه ورايح فين وجاى منين دة حقهم والقانون بيقول كدة إنما دة كلة طبعا بكل
زوق وإحترام ومعامله كويسه ودة اللى بيسموه ولاد البلد الحكومة مثبتانا أو
بلغه القانون الاستيقاف أو التوقيف تمام كدة فى النقطة دى يعنى ما تمشيش فى
الشارع وساعه ما تشوف ظابط تفلق لا تمشى عادى وكأن مفيش أى حاجة .طيب هيطلع واحد
يقولى انا مرة وانا ماشى فى الشارع طلع عليا الظباط وقالى احنا مشتبهين فيك
وعاوزين ناخدك القسم نتحرى عنك ؟ هقولك أنا بص يا عم أولا موضوع الاشتباه
أو بالاصح قانون الاشتباه إتلغى من سنة 1993 فالظابط لما يوقفك بكل إحترام
وبكل زوق قله لو سمحت قانون الاشتباه إتلغى من 17 سنة .طيب فى ناس قلبها
خفيف يعنى هو مجرد ما يشوف الظابط رجليه بتخبط على الجيران ممكن كدة يفتكر
البعض إنه هو بيحط نفسه موضوع شك وريبة هقولك لاء مجرد قلقك بس لا يعد من
مظاهر الشك والريبة دا عادى لان فى ناس عندها الخوف أساسا من مجرد رؤية زى
الشرطة زى واحد عمرة ما دخل قسم شرطة إلا علشان يعمل بطاقة وتانى مرة علشان
الجيش يعنى حالات زى دىطيب هيطلع واحد
بردك يقولى ماشى يا عم أنا قولت للظابط كل الكلام الل انت قولته دة وقالى
بكل إحترام انت كلامك صح بس انت هتيجى معايا القسم نشوف اسمك بس وتمشى هقولك لاء طبعا
متروحش معاه لان لو هو شاكك فيك فعلا هيتحرى عنك باللاسلكى اللى معاه
ويتأكد انك مفيش عليك أى أحكام لانك لو عليك حكم غيابى أو حضورى أو ليك امر
ضبط وإحضار أو غيرة هياخدك لانك كدة مطلوب وعموما أى أحكام من دى بتكون
موجودة على كمبيوتر وزارة الداخليةطيب لو طلعت له البطاقة وقالى طلع اللى فى جيوبك ؟ كلام جميل أول شىء
هنام نركز عليه إنك تكون ثابت وأنت بتتكلم وتقوله يا حضرة الظابط سيادتك
راجل قانون ( ودى اول غلطة فى الكلام بس لما بتقوله كدة بيتنفخ فقولها
وخلاص ) وفاهم القانون أكتر منى وعارف إنه لا يجوز القبض أو التفتيش إلا
بعد استصدار إذن من النيابة العامة ولو فتشتنى هيكون إجراء غير قانونى
وسيادتك مترضاش تخالف القانون واحد هيطلع من اللى مستخبين ورا اقعد ياض بس أنا هريحك ... بردك عاوز يتكلم .... يا أخى انا عارف انت هتقول ايه ...... خلص قول يعنى هو هيرضى انه
ميفتشنيش هيقول للعساكر امسكوة وهيطلع كل اللى فى جيوبى ؟ مش هقلتلك عارف
هتقول ايه بص يا سيدى هو أول شىء لو شافك عارف حقوقك كويس ودة اللى احنا
عاوزينة من موضوعنا دة قبل ما يفكر انه يفتشك هيفكر ألف مرة لانه شافك عارف
حقوقك إنما لو عمل اللى انت بتقولة دة عرفه قوله انا هشتكيك للمأمور
ولمفتش الداخلية ( أو زى ما بيسموة رزل الداخلية أو البعبع من الاخر دة
محطوط شغلته الرزالة على الظباط لو واحد شايف نفسه يتوافر فيه الشرط دة
يتقدم بطلب وربنا يسهل ) بس خود بالك لو شافك عارف حقك وهو فى دماغه إنه
ياخدك هيعمل ايه بقا معاك هيحاول يستفذك علشان يستعمل حقة الطبيعى الل هو
ايه انك تعتدى عليه بالسب أو بالضرب علشان يعملك محضر تعدى على موظف ميرى
أثناء تأدية عمله بس تحاول يكون معاك أى شهود من اللى واقفين معاك أو اى حد
ماشى فى الطريق طيب لو ايدة طولت ولمست ......... وضرب أو شتم ؟بص يا سيدى النقطة
اللى انا بركز عليها بردك إنك تكون عارف حقوقك وإنك تتكلم برجوله ( عذرا
للأنثات إنما الرجولة مطلوبه هنا أكتر ) وانك عمرك ما هتسيب حقك وإنك
هتشتكية هيفكر ألف مرة قبل ما يعمل معاك حاجة وعرف انك لو رحت هناك القسم
هتطلب مقابلة المأمور وهتحكيلة اللى حصل وهتتمسك بحقك لان دايما المأمور
بيكون راجل كبير وفاهم إن الظباط دول عندهم طيش وحاجات من دى فبيكون فاهم
وعارف المسؤلية كويس وهو طبعا رئيس كل اللى فى القسم وتصمم إنك تعمل محضر
فى القسم ولو رفضوا تعمل محضر عند مفتش الداخلية فى مديرية الامن أو تطلع
تقدم البلاغ فى النيابة طيب انا قولت هعمل محضر عملوا المثل اللى بيقول ضربنى وبكى وسبقنى واشتكى وعملولى محضر تحرى وحبسونى ؟لسه بيقول محضر
تحرى ما قلنا ياعم مفيش حاجة اسمها محضر تحرى لو عملوا معاك كدة إوعى تمضى
على أى محضر لو وصلت إنك هتموت من الضرب هم أخرهم معاك قلمين على شلوطين
إستحملهم إنما إوعى تمضى وحاول تتصل بأهلك أو اى حد من أهلك يبعت فاكس
لوزير الداخلية ولمفتش الداخلية والنائب العام ورئيس النيابة بتاع منطقتك
اللى انت ممسوك فيها ويقولوا انك ممسوك فى القسم بدون وجة حق وياريت تكتب
اسم الظابط فى الفاكس ولو تعرف محامى اتصل عليه وهو هيجى يلحقك فى القسم
وهيطلعك لو مفيش عليك أى حاجة (وأظن انا ذكرت حوادث ليا مع النيابة والشرطة
فى نفس الوقائع دى ) من أحكام ولا غيرة .طيب هتصل إزاى يا عم وهم أول حاجة هياخدوها منى التليفون ؟ أولا من حقك قانونا
انك تتكلم فى التليفون وبعدين صرف نفسك يا معلم خلى أى عسكرى يتصلك بأهلك
ولو دخلوك الحجز تعتبر نفسك فى سنترال هتلاقى جوة مليون تليفون تتصل منه طيب هو أنا مش عارف
عنوان أى حد من اللى انت قولت عليهم دول ؟ هات ورقة وقلم وسجل ورايا
الحاجات دى وحطهم فى جيبك للظروف ليك أو لغيرك السيد المستشار النائب العام - القاهرة دار القضاء العالى بالجلاء .السيد اللواء وزير الداخلية – القاهرة لاظوغلى مبنى وزارة الداخلية .السيد اللواء مفتش الداخلية – بيكون موجود فى مديرية الامن التابع لها المركز اللى انت ممسوك فيه .السيد الاستاذ رئيس النيابة – بيكون عنوانه فى نفس المكان التابع ليه المكان اللى ممسوك فيه .وبعدين متخافش كدة
موظف التلغراف عندة كل الأرقام دى والعنوان كمان بس إوعى تبعت الفاكس وتمشى
تاخد رقم الفاكس أو التلغراف وميعاد إرساله الكعب يعنى .ياعم أنا عمرى ما اشتكيت حد ولا بعت تلغراف فى حد ولا بعرف أكتب الحاجات دى !!!أكتب عندك نوذج التلغراف أو أو الفاكس السيد / ( المستشار
النائب العام أو اللواء وزير الداخلية أو اللواء مفتش الداخلية أو السيد
الاستاذ رئيس نيابة ...... ( المنطقة اللى انت ممسوك فيها ) تحية طيبة وبعد فوجئنا بقيام السيد
( الملازم أول أو النقيب أو الرائد أو ..... ) وقوة من شرطة قسم (
..........) بالقبض على شقيقى أو صديقى أو .........من منزلة أو من الشارع
أو من محل عمله أو ........بتاريخ / / 20 الساعه وقاموا بتفتيشه واقتياده
بالقوة بعد شل حركتة ونخشى من تلفيق أى إتهام إليه بدون وجه حق ، برجاء
التكرم بسرعه التحقيق فى الواقعة وإخلاء سبيله والتحقيق فى واقعه ضبطة
وتفتيشه بدون إذن من النيابة العامة وإحتجازة وحبسه فى القسم بدون وجه حق وتفضلوا سيادتكم بقبول وافر الاحترام مرسلة لسيادتكم الاسم / العنوان / رقم التليفون / البطاقة رقم /عاوز أعرفكم شوية حاجات فنية من شغل المحامين والظباط ووكلاء النيابة دايما الظابط عارف
إنه ممكن يتعمل فيه شكاوى بيروح دايما وبيحاول يستصدر إذن من النيابة قبل
ساعة بلاغك يعنى انا مبلغ إن إبنى مقبوض عليه الساعه 2 ص بيروح هوة ويعمل
كل شغله على اساس انه كان الساعه واحدة ظهرا هتقولى طيب ما انا وانا ببعت
فى الفاكس بيبان الوقت هقولك علشان كدة قولتلك اوعى تسيب الكعب لان دة دليل
برائتك وممكن تدين الظابط بيه بعد كدة علشان كدة سرعة إرسال الفاكس ممكن
يكون هو دة زى ما قلت دليل برائتك وإدانته بس ما تروحش تقولة أنا اشتكيتك
الساعه كذا علشان هو يعمل بقا إحتياطاته طيب تعالوا قبل ما أنسى أربط الموضوعين ببعض هذا الموضوع والموضوع الاول البطاقة والسؤال عنها والاستيقاف أو زى ما بيقولوا التحرى السؤال عن البطاقة
حق لكل ظابط شرطة أو أمين أو غفير كل واحد من دول من حقه يسألك عن بطاقتك
ويتأكد من شخصيتك ودة شىء لحفظ الامن ولو مفيش معاك بطاقة يعملوا ليك محضر
مخالفة فى المكان اللى انت فيه انما ما ياخدكاش على القسم أو يقبض عليك أو
يفتشك ومن غير استخدام اى قوة وبكل أدب لكن الاستيقاف أو
التحرى او التثبيت دة كل شخص بيضع نفسه موضوع شك وريبة ( وقلنا معناهم ) من
حقهم الاستعلام عنه عن طريق اللاسلكى ولو عليك أحكام غيابى أو حضورى أو أى
حكم واجب النفاذ أو أمر ضبط وإحضار من النيابة أو المحكمة ياخدوك على
القسم وزى ما قولنا مش من حق أى حد انه يهينك بالضرب او السب او أى شكل من
أشكال الاهانه يارب أكون قد وفقت فى عرض الموضوع نقطة أخيرة أحب أوضحها ايه هى انواع الاحكام ودرجات التقاضى علشان لو قالك عليك حكم تفهم هو بيقولك ايه أولا أنواع الاحكام الحكم الحضورى : ودا انت بتكون موجود فى الجلسة أثناء النطق بالحكم او المحامى حاضر عنك ودا أول درجة الحكم الغيابى :
انت بتكون غير موجود ولا موجود عنك محامى وإتاخد عليك حكم غيابى ودا أيضا
بيكون أول درجة بتروح تعمل معارضى فى الغيابى وبتفضل فى أول درجة إنما فى حاله الحضورى بتعمل إستئناف وتروح لتانى درجة .يارب أكون وفقت فى
عرض الموضوع ويارب تكونوا عرفتم يعنى ايه استيقاف وان مفيش حاجة اسمها
يتقبض عليك تحرى وايه المفروض تعمله لو ظابط وقفك فى الطريق أو أخدك بدون
وجة حق وايه هى أنواع الاحكام .أشكركم جميعا وإعزرونى هذا أقل شىء ممكن أكتبة فى موضوع زى دا .وياريت لو فى أى
تعديل على الاسلوب أو اى جزئية لم أوفق فيها أو أى غلطة رجاء إلتمسوا ليا
العزر وعرفونى علشان أصحح طريقى فى المرات القادمة وأعمل الصح بس على فكرة إحنا بعد كدة هندخل فى حاجات تقيلة فلازم أتأكد انكم عرفتم دول كويس علشان نقدر ندخل فى التقيل وإحنا مطمنين هنتكلم بعد كدة عن
القبض والتفتيش والتلبس والزنا والدعارة والفجور وممارسة الفعل الفاحش وزنا
الزوج وزنا الزوجة ( أنا قبل ما هكتب أى موضوع من دول هقول قبلها علشان اى
حد بيتحرج يا جماعة ما يدخلش إنما أنا هتكلم عن الاشياء دى كلها فى
السلسلة لو فى أى إعتراض من الان ياريت أعرفه ولو راى الاغلبيه إلغاء هذا
الجزء نلغية براحتكم ) وهنعرفكم يعنى ايه ضبط وإحضار وطلب حضور للقسم وطلب
حضور للنيابة للشهاده أو للسؤال فى أقول منسوبة إليك وامته تروح وامته
ماتروحش وكلمة كعب داير ولما ظابط ياخدك ويقولك انا هلففك كعب داير وتسجيل
المكالمات ( تعرفوا ان كل تقريبا كل مكالماتك ناس بتسمعها معاك فى نفس
الوقت أو فى وقت لاحق ) وهدخلكم القسم إن شاء الله وأعرفكم على كل واحد فى
القسم وشغلته ايه وحقوقك ايه جوة قسم الشرطة طيب انت لو متهم يتعمل معاك
ايه مع خالص تحياتى وإحترامى محامى الغلابهالجزء الاول سلسلة حقك وواجبك ــــــــــــــــــــــــــــــــــــــــــــــــــ ـــــــــــــــــــــمادة 262 من التعليمات العامة للنيابات
الطعن رقم 16580 لسمة 67ق جلسة 2/2/2000جنائى
الطعن رقم 23380 لسنة 59ق جلسة 12/4/1990 جنائى
حكم المحكمة الدستورية العليا بجلسة 2/1/1993 رئاسة المستشار عوض محمد المر
نقض 30/3/1953 قواعد النقض ج2 رقم 20 ص929
نقض 7/11/1955 قواعد النقض ج2رقم 22 ص 929
الطعن رقم 1762 لسنة 31 ق جلسة 10/4/1962 س13 ص239 جنائى
مادة 263 ، 362 من التعليمات العامة للنيابات
نقض 30/12/1957 أحكام النقض س 8 رقم 273 ص 998،
نقض 12/1/1959 أحكام النقض س8 رقم 168 ص772
الماده 41 من الدستور ،
نقض 4495 لسنة 58 ق جلسة 24/1/1990 أحكام النقض
المادة 282 ، 280 من قانون العقوبات فقرة 2،
نقض 16258 لسنة 66ق جلسة 1998 أحكام نقض
الماده 282 ، 280 من قانون العقوبات ، مادة 139 من قانون الاجراءات الجنائية .
ماده 139 من قانون الاجراءات الجنائية
نقض 4495 لسنة 58 ق 24/1/1990 أحكام النقض
نقض 16/5/1996 أحكام النقض س 17 رقم 10 ص 613للمزيد من مواضيعي
| |
|
