موضوع: سلسة حقك وواجبك الجزء الاول ( هات بطاقتك ) الأحد أغسطس 29, 2010 1:55 pm
بسم الله الرحمن الرحيم
أخوانى وأخواتى الاعزاء
شرعت فى كتابة موضوع حقك وواجبك وهذا الموضوع كى يعرف كل فرد حقه وواجبة مقابل أفراد السلطة العامة .
أقولكم حاجة سبنونا من الكلام الكبير دة وكلام الناس بتوع القانون المعقد وتعالوا بينا نقعد مع بعض ونتكلم بكل وضوح وبراحه خالص علشان فى نسبه كبيرة مننا متعرفش حاجة عن القانون وبتتعقد لما تسمع أسم القانون أو تيجى سرته
ودايما كل دارسى القانون بيحاولوا يتكلموا بالاسلوب دة ( ياريت مفيش محامى يزعل منى ) لاننا متفوقين بعلمنا القانونى ومع ذلك بنقرأ فى كل المجالات زى الطب والهندسة والصيدلة ...... الخ حسب طبيعة القضايا إدامنا ما علينا
المهم ايه الل خلانى أكتب موضوع زى دة
الوضع الحالى فى البلد أصبح سىء جدا الشرطة ماشية تموت فى الناس بعض الناس الل تلبس ميرى يفتكر نفسه بقى وزير الداخلية وطايح فى الناس يمين وشمال حتى حكالى واحد من الشرطة بيقولى اننا لما كنا فى الكلية كانوا بيقولوا لنا لما تروح مكان إوعى تقف زيك زى اى حد انت تقف فى جمب لوحدك وتلبس النظارة السمرا وتعمل ليك شخصية وتروح على مكتب المدير إوعى تقف فى طابور لازم تعمل نفسك عليهم علشان يحترموك ويخلوك إيمة وكتر خيرة بصراحة الباشا الحبيب العادل ماشى زى العسل عقابهم زى العسل لفت نظر حبس شهر أو 6 شهور ( زى واحد كان عاوز يلفق قضية مخدرات لواحد والواد رمى نفسه من الدور الثانى بعد ما أخد علقه موت والمخبر أخد حبس 6 شهور عادى ) المهم الموضوع بقى صعب قولى وكل واحد يتكلم عن الموضوع ده إما انه يتاخد او يحصلة أى حاجة ومش هنروح بعيد طبعا عارفين هما عملوا ايه فى المرأة بتاعه المنصورة من كام يوم إغتصاب من قبل رجال الداخلية والواد بعد ما يتقبض عليه يهرب والظباط محدش يعرف عنهم حاجة ما علينا
ثانى شىء عندنا مبدأ قانونى هام وصعب أوى
""لا يعذر المرىء بجهله بالقانون ""
نحطة بين أقواس ونظبطة لان الموضوع دة هو اصل حوارنا الهام يعنى ايه لا يعذر المرىء بجهلة بالقانون يعنى أى قانون يصدر فى البلد انت ملزم انك تكون عارفه ولو خالفته تعتبر مستحق للعقاب وعدم معرفتك به هذا فى حد ذاته جرم تعاقب عليه تفترض القاعده أن القانون طالما خرج إلى حيز النور والتنفيذ عن طريق مناقشتة فى مجلس الشعب ونشرة فى الجريدة الرسمية يعتبر معلوم للكافة فبذلك أنت مطالب بالعلم به يعنى بكدة نقدر نقول على قاعده ( المتهم برىء حتى تثبت إدانته ) إلى مسماه الصحيح ( كل شخص متهم حتى تثبت إدانته أو على الاقل نعرفه)
كدا عرفت كل حاجة يبقى انت الان محتاج تعرف كل حاجة علشان تكون فى الصورة وفاهم كل شىء .
ندخل بقى فى الموضوع
أول شىء أنا بعرض ليكم مجموعة أشياء أساسية لازم تكون عند كل واحد وهم
الدستور المصرى على الاقل المفروض تكون عندك خلفية عنه
قانون الاجراءات الجنائية ودا احنا كقانونيين بنسمية قانون الشرفاء لانه بيعرفك كل حقوقك وبيقولك تعمل ايه لو واحد وقفك فى الشارع قالك بطاقتك وغيره وغيره
قانون العقوبات ودا بقا قانون المجرمين لان دا معمول للمجرمين ولعقابهم
حمل من هنا (الدستور المصرى )
حمل من هنا(قانون الاجراءات الجنائية)
حمل من هنا(قانون العقوبات)
نبدأ باسم الله وإن شاء الله هفرد لكل موضوع مقال علشان الكل يقدر يستفسر براحته
تعمل ايه لو واحد من الشرطة وقفك وقالك بطاقتك ؟ هتطلعها وتقوله انت مين ولا هتعمل ؟ حط ايدة فى جيبك وطلع موبايلك أو فلوسك ؟ طب لو قالك سيب أحسن هاخدك على القسم ؟
طيب لو قالك انا مباحث ؟ هتعمل ايه ؟ تتأكد منه إزاى ؟
طيب لو انت راكب ميكروباص وجاى من مشوار والظابظ وقف العربية وقال كل اللى فيها ينزلوا ويطلعوا بطايقهم ؟وكان عاوز ياخدك على القسم ؟
جالك ظابط البيت وعاوز يدخل بيتك ؟ هتسيبة ولا هتعمل ايه ؟
طيب لو قالك معايا أذن نيابة شكلة ايه اذن النيابة ؟ مكتوب إزاى ؟ شكل ختمه ايه ؟ موقع من مين ؟ طيب بيكون كام صورة ؟ طيب لو مفيش معاه إذن نيابة هتسبهم يدخلوا بيتك ولا ؟ طيب كسر الباب ودخل فتش بيتك وفتش من غير إذن نيابة طيب لو أخدوك بالعافية أهل بيتك يعملوا ايه ؟ أخدوا حد من عيالك أخوك أبوك أمك أختك ؟ طيب لو فتش أختك أو أمك أو بنتك ؟ أو طلب منها تخلع هدومها أو جزء من هدومها ؟ طيب لو أخدوا واحد غير المطلوب القبض عليه ؟
طيب لو جالك واحد وقالك البيه الظابط عاوزك فى القسم ؟ تروح ولا لاء ؟ طيب طلعلك طلب حضور وقالك لازم تيجى معايا ؟ طيب تعرف سبب طلب حضور للقسم ولا لاء ؟ طيب عليك مسئولية لو رفضت تروح ؟ طب يقدر ياخدك بالعافية فى طلب حضور ؟
طيب لو فى ضبط وإحضار ؟بيكون شكلة ايه ؟ بيطلع منين مكتوب بخط اليلد ولا مطبوع ؟ طيب هيخدوك بالاندر وير ولا يسبوك تلبس ؟ طيب ايه حكاية اللى بينزلوا من البيت فى ملاية؟
طيب أنا قولت طلب حضور للنيابة وطلب حضور للقسم فى فرق بينهم ؟
طيب لو عليك حكم تروح ولا لاء تعرف الحكم ولا هياخدوك على طول ؟
طيب فى حكم غيابى وحكم حضورى وفى مخالفة وفى حكم نهائى ايه الفرق بينهم ؟
طيب لو جة ياخدك مين اللى من حقة ياخدك ؟
لو انت ماشى بالعربية مين يطالبك بالرخصة ؟
طيب تعمل ايه لو طلب يفتش عربيتك او طلب يتفش اللى راكبين معاك أو هياخد حد منهم طيب لو أخد رخصتك مع انها سليمة ؟
طيب لو واحد أخد خطيبته ( بلاش نقول واحدة تانية ) وطلع يفسحها وجة واحد غلس فى لحظة حلوة والمشاعر طايرة والحاجات الحلوة دى وقالك بطاقتك ( انا من رأى تضربة بالنار لتعكيرة صفوكم الجميل ) وبطاقتها طيب لو كان عاوز ياخدكم على القسم ؟
طيب من حقك تعزم صحبتك فى البيت ؟ ولو جالك واحد فى البيت وعاوز ياخدكم ؟ طيب لو عازم أصحابك وصحباتك وعاملين بارتى ؟ هياخدكم ولا هيعمل ايه ؟
طيب لو عاكست فى الشارع ممكن يتعملك قضية ايه دعارة ولا زنا ولا فعل فاحش ولا فجور ولا ايه بالظبط ؟
تتصرف إزاى لو لقيت مراتك مع واحد تانى ؟ أو مع واحدة صاحبتها ؟ تعملى ايه لو لقيتى جوزك بيمارس الجنس مع واحدة فى البيت ؟ أو مع واحد ؟
طيب تعملى ايه لو واحد عاكسك أو عاكسك ( ولد أو بنت ) أو حاول يتحرش بيكى أو يمسك جزء حساس من جسمك أو يهتك عرضك ؟ أو حاول يغتصبك فى اتوبيس أو ميكروباص ؟
طيب لو حد من الشرطة شتمك أو شتم حد من أهلك تشتكية لمين ؟ وتثبت إزاى انه شتمك أو ضربك أو لفقلك تهمة ؟
طيب لو داخل تعمل محضر فى القسم هتعمله عند مين ؟ أزاى تعملة ؟ وتعمل ايه لو رفضوا يعملوا ليك المحضر ؟ وايه الفرق بين المحضر والشكوى والبلاغ ؟ وايه حقوقك وانت مقبوض عليك ؟ أو محجوز ؟وايه الفرق بين الحجز الحبس والسجن ؟
طيب لو شفت واحد مات أو بيتعذب فى القسم تثبت إزاى وتشتكى لمين ؟ وتروح تقدم الشكوى لمين ؟
انتى بنت محترمة وماشية فى الشارع واحد من الشرطة استخف دمة ومش لاقى حد يلمة وبيعاكسك وقالك هاخدك على القسم لو ما نفزتيش اللى هو عاوزة او هيعملك قضية ؟ هتعرفى تشتكية ولا لاء ؟ طب لو قالك هعملك قضية أداب يقدر ولا لاء ؟
وهل ممكن يتحاسب فعلا لو ضربك ولا هيحصلة ايه ؟
كل ظابط بيكلمك الوقتى يقولك قانون الطوارىء ومعايا أمر أعتقال على بياض الكلام دة صح ولا غلط ؟ وايه حكاية قانون الطوارىء وبيتنفذ على مين ومين بينفذه ؟
طيب الجماعة بتوع الحبشتكنات والكرفتات اللى هم حقوق الانسان ويتكلموا كلام كتير وانت مش فاهم حاجة وياخدوك فى التوهان ؟
وجمعيات حقوق الانسان والكلام الحلو دة وايه موضوع حقوق الانسان والجمعيات والحكومة بتقول حقوق الانسان وبقت عاملة المجلس القومى لحقوق الانسان شغلته ايه ده ؟ ودول طبعا قفاهم معاه حصانة ومحدش يقدر يكلمهم ( كارنية ب1000 ج وقفاك ياخد حصانة على طول ) طب الغلابه يعملوا ايه ؟
طبعا بتقولوا الراجل دة شكلة فاضى هى الحكومة بتهمها قانون ولا غيرة انت فاكر نفسك فين انت فى مصر .......
وناس كتير بتقول ياما ناس اتكلموا ولا كأن فى حاجة وعادى ياعم ريح دماغك سبنا فى حالنا شكلك عاوز تودينا فى داهيه ( انا عارف إن أمن الدولة أول ناس هيردوا على موضوعى )
يا جماعة خلينا مرة منخافش والله ما بياخد الروح إلا اللى خلقها وسيبونا من كل اللى جابنا ورا عيش ندل تموت مستور وضرب الحكومة شرب والسجن للجدعان وإحنا السمك وهما الشبك يا جماعة لو كل واحد ساب حقه وقال انا استنى لما حد يجبهولى لحد عندى أو مش عاوز حقى يا جماعة المال السايب بيعلم السرقة والفساد والضرب على القفا والحبس والتعذيب وأحيانا الموت من كتر التعذيب وبصراحه اللى يتنازل عن حقه يستاهل كل اللى يحصلة وياخد على قفاه لما يشبعوة من غير زعل ولا غيرة ياخد على قفاه وعلى دماغة
بس طبعا اللى يهمنا التعامل مع الناس اللى قدمنا وهم الشرطة اللى طايحين فى الناس البيه معاون المباحث ورئيس المباحث والظباط والمخبرين (زبانية جهنم ) والامناء والمرشدين اللى ممكن يكون صاحبك بس لما يلموا الوحشين يبقى ليهم حق طبعا إحنا عاوزينة يلم كل الوحشين بس ما ياخدش الكل بذنبة ويلم فى الجميع وميبطلش لم فى الناس وقضايا وغيرة وغيره إحنا عاوزين كل واحد يعرف حقة علشان تقدر تتمسك بيه .
تعالوا بينا نشوف حقوقنا وواجبتنا ونشوف هو انت انضربت على قفاك قبل كدة وحد أكل عليك حقك ولا لاء.
هنبدأ أول نقطة وأهمهم وأول حاجة بتعرفه أنت عارف حقك ولا لاء
البطاقة الشخصية
تعمل ايه لو واحد وقفك فى الشارع وقالك بطاقتك بلاش نروح فى دوكة أنت الاول تعرف ان دة شرطة ولا لاء ما هو يا جماعة مش كل واحد هنسأله انت شرطة ولا لاء النظر بردك له حكمة يعنى متجيش جمب قسم الشرطة وواحد بيقولك بطاقتك وهو لابس ميرى إنما لو فى مكان نائى مثلا وواحد بيقولك بطاقتك أولا حاجة نتأكد أن دة شرطة إزاى نتأكد تطلب كارنية الشرطة بتاعه طيب مستغرب وبتقول الراجل دة ......... معقول الظابط هيطلعلى كارنية الشرطة بتاعه أقولك أيوة هو مش ممكن يكون واحد نصاب ولابس لبس شرطة ما هو انت بردك مش عارف كل رجال الشرطة على مستوى وزارة الداخلية ولا معاك كشف بيهم يمكن عاوز يثبتك ياخد فلوسك موبايلك هتقولى هيشتمنى صدقنى دول أول ناس لو شافوك عارف حقوقك كويس ما هيعرفوا يقولوا عليك أى حاجة ولا يعمل معاك أى حاجة وهيعاملك كويس لانه شافك فاهم إنما لو من أول شخطة طلعت بطاقتك خلصت يا معلم يبقى هتاخد على قفاك واحد هيرد عليا ويقولى يا فتك ما هو ممكن يطلع ليا أى كارنية ويقولى أنا ظابط شرطة أو واحد مزور أقولك أولا لو كان مزور يبقى انت على الاقل ما فرطش فى حقك وحاولت تحافظ عليه لاخر لحظة أما من حيث كارنية الشرطة فده شكلة
طيب شوفنا الكارنية وعرفنا أنه شرطة مين منهم بقى من حقة يشوف بطاقتى هو كل واحد تبع وزارة الداخلية هيشوف بطاقتى أقولك أة المأمور من حقة الظابط معاون المباحث الأمين العسكرى حتى الغفير النظامى من حقة يشوف بطاقتك لانك راجل كويس هتخاف من ايه هتورية بطاقتك لان القانون إداة الحق دة
طيب أنا راجل ماشى فى عز الظهر يشوف بطاقتى بردك ولا بالليل بس ؟
أقولك لاء من حقة يشوف بطاقتك فى أى وقتك سواء كنت بنت أو ولد راجل كبير أو ست طيب أنا لو مفيش معايا بطاقة يعمل ايه ؟ كل اللى هيعملهالك مخالفة وتاخد ورقة بالمخالفة
واحد هيقولى شكلك بتهظر هيقوم واخدنى على البوكس على طول ؟ أقولك لاء مش من حقة لان دى مخالفة والمخالفة تعاقب بالغرامة فقط ولا تعاقب بالحبس طبقا لقرار رئيس الجمهورية (إحفظوا ورايا )
طيب لو انا نازل أشترى حاجة ونسيت أخد بطاقتى معايا هيقبض عليا ؟ قولتلك لاء طبعا إحنا قولنا ان دى مخالفة والمخالفات لا يجوز فيها الحبس وإنما الغرامة المالية فقط حاول ساعتها تتصل بحد من البيت يجبلك البطاقة هتقولى مفيش معايا موبايل هقولك صرف نفسك وحاول تتصل بأهلك يجيبم لك البطاقة
طيب لو أخد بطاقتى غصب عنى يبقى إرتكب جريمة فى حقك ومن حقك تعمل فيه محضر فى القسم لانه إرتكب جريمة فى حقك
طيب ايه اللى يثبت شخصيتى ؟
كل حاجة طالعة من وزارة الداخلية تقدر بيها تثبت شخصيتك زى البطاقة أو جواز السفر أو رخصة القيادة .
لو أنا طالب فى الجامعة ومعايا كارنية الجامعة هينفع ؟
لا طبعا كارنية الجامعة مخصوص فقط لدخول الجامعة وميغنيش عن البطاقة
طيب ايه السن اللى يطلع فيه البطاقة ؟
كل مواطن يعيش فى مصر لابد أن يحمل بطاقة الرقم القومى ببلوغة سن السادسة عشر 16 سنة
طيب لو قلت انا مش مطلع بطاقة إلا لما أطلعها طالب جامعى او مش هطلعها طالب ؟ أقولك هتتحبس 6 شهور أو بغرامة متقلش عن 100 ج ومتزيدش عن 5000 ج
طيب لو ضاعت ؟ يبقى من حقك إنك تطلع بدل فاقد للبطاقة بتاعتك وبتطلع خلال 15 يوم أو فى خلال يومين عن طريق المستعجل بس طبعا تعمل محضر علشان تثبت حاله
طيب لو عملت فتك وقلت لما أروح أعمل بطاقتين ؟أقولك يا فتك لو ثبت إنك معاك بطاقتين هتتعاقب لالحبس مده متزدش عن سنة أو بغرامة متقلش عن 200 ج ومتزدش عن 500 ج ولو سببت ضرر لحد هتتعاقب بعقوبتين عقوبة الحبس 6 شهور وغرامة متقلش عن 500ج ومتزدش عن 1000ج او واحدة من العقوبتين حسب جسامة الفعل ولو إديتها لحد غيرك تتعاقب بنفس العقوبة
كدة أظن أنا أجبت عن كل شىء يخص البطاقة نتقابل إن شاء الله فى الجزء القادم مع بقية الاسئلة علشان يكون فيه تشويق وعدم الملل من الاسلوب وياريت لو فى اى مشاكل انا مستعد للاستفسار وأى تعديل فى الاسلوب ياريت أعرف علشان أعدل فى الاجزاء القادمة
محامى الغلابه
الجزء الثانى [size=21]سلسة حقك وواجبك الجزء الثانى (حبس 24 ساعة تحرى)[/size]
موضوع: سلسة حقك وواجبك الجزء الاول ( هات بطاقتك ) 
""لا يعذر المرىء بجهله بالقانون ""
