يوميات واحد مدفوس فى أتوبيس الاضطراب الجنسي التحككي ..!!

فى إجتماع مجلس الاخوة المهيسين الأسبوعي على قهوتنا المفضلة سألني أحد الجهابذة وهو يشد الشيشة بعمق ( تفتكر ليه كترت أوعي حكايات التحرش الجنسي فى الايام الاخيرة ! ) فرددت عليه بسؤال (مين بيتحرش بمين ؟!) (قاللى بيتحرشوا بالبنات يا باشا ) ..قولتلهم يا جدعان على فكرة رجاله أوستات بيتم التحرش بيهم وكل واحد يخلى باله من نفسه بأه .. ومع علامات الازبهلال الطله من العيون هرش احد المهيسين فى رأسه وقالي هم الرجاله حد بيتحرش بيهم ؟! .. فحكتلهم حكاية أتوبيس الغبرة اللى بيلف اسكندرية كلها وهو أتوبيس غريب وعجيب بيتكون من 3 أرقام وهو أتوبيس 145 .

أخدت الأتوبيس فاضي من المنتزة على أمل إنى أوصل الشاطبي ديركت عن طريق البحر فى كتيره نص ساعة .. لاقيت أتوبيس الهنا عمال يدخل فى زوارق وشوارع جانبية ويلف مع نفسه على طريقة ودنك منين يا جحا وبعدين فين وفين لما خرج على الكورنيش من شارع 45 ..بس ما شاء الله خرج على الكورنيش بعد لما أصبح علبه سردين ..والحمد لله انى كنت قاعد فى أول كرسي بعيد عن اللبش .. وخير اللهم اجعله خير واحنا قاعدين وربنا كافينا شر الركاب الواقفين إذ فجأة نسمع صوت أنثوي ناعم بيصرخ وبيقول ( يا قليل الادب ) .. وطرقة كده تشبه صوت حد خد على قفاه لكن الحمد لله طلع على خده بس .. وهرج ومرج فى الاتوبيس و(فيه إيه يا جماعه) طلع أن فيه واحد تحرش بواحدة وعمل حاجات مش ولابد فى الزحمة .. الركاب اتوصوا بيه كام قلم على كام قفا ونزلوه من الاتوبيس ..

وما بين إستعجابي وإستعجاب الراجل اللى كان قاعد جمبي وأثناء تحليلنا أنا وهو لسلوك المتحرش فى وسيلة لمضيعة وقت الطريق إذ بنا نسمع صوت عالى لتاني مرة يصرخ ( يا ولاد الــ ...) بس الغريب ان الصوت ده كان رجالي ويظهر ان اخدله نصيبه هو كمان .. والراجل هاج وماج وهو بيدور على اليد الدنيئة اللى عملت فيه كده ومش لاقيها .. وفى تقديرى الشخصي ان فى اتوبيس من ماركة علبه السردين التحرش بيبأه عمياني راجل أو ست موش مشكلة عند المتحرش اهو كله ماشى بطريقة ميضرش ومرة تصيب ومرة تخيب .. واهو برضه بيحقق مبدأ أصيل من مبادىء حقوق الانسان وهو مساواة الراجل والمرأة.

وإذا كان التحرش اللى بيحصل دلوقت اغلبه او كله تقريبا منصب على المرأة فى مترو أو أتوبيس أو حتى فى الشارع يخلينا نسأل سؤال اللى طرحه علينا الأخ المهيس فى قعدة القهوة واللى هو ( ليه بيحصل تحرش جنسي للبنات ؟!) .. الكتير من اللى أجابوا عن السؤال ده حصر الاجابة فى جملة واحدة وهى ( ان الحجاب هو الحل ) ولما بيقولوا حجاب قصدهم الحجاب الشرعي مش الحجاب التيواني .. لكن واحدة من القرشانات من بتوع جيل الستينات وإحدى راكبات أتوبيس الغبرة قالت وهى بتمصمص شفايفها وبتتحسرعلى زمن المنى جيب الجميل : ( إحنا كنا زمان بنلبس محزق وملزق وفوق الركبة ولا كان على ايامنا تحرش ولا حاجه ..)

وعلشان تكون الصورة مكتملة حنقلكم رأى تالت لواحد من بتوع علم النفس فى أحد الجرايد قال ( ان المتحرش فى الاتوبيسات بيعاني من إضطراب جنسي تحككي ) .. حلو المصطلح ده ! .. بس أنا رأيي الشخصي هو وسط بين كل الاراء دي ايوه فيه منقبات ومججبات حجاب شرعي موش تيواني بيتم التحرش بيهم لكن دول قلة ومتحسبش الحجاب التيواني فى الحسبة ..كمان فيه حاله من الكبت الجنسي بسبب ارتفاع سن الزواج من ناحية ومن ناحية تانية البطاله اللى هى اصل كل بلوى .. عموما القضية دي مهمة .. لان احساس اى انسان بالامان فى الشارع مهم جدا .. بس اهم حاجه تخلى بالك وانت راكب اى اتوبيس علبه سردين مش بعيد تلاقى اتنين او تلاته عندهم اضراب جنسي تحككي !!

منقول للامانه

هههههههههههههههههههههههههههههههههه
ميرسى اوى على الموضوع الظريف دا
ولو انها فعلا حقيق ومش بتحصل غير عندنا
ومش بنشوف برة الحاجات دى مش عارف ليه

هههههههههههههههههههههه
شكرا ليكى ياغادة بجد موضوع هايل وتحفة
بس الحمد لله انا مش بركب اتوبيس بس فعلا بسمع فى الجرايد
حجات كتير اوى كدة بس اعتقد ان دة سببة عقدة نفسيه والمفروض
يكون فى عقوبات على دة عشان يبقى فى امان شويه دة احنا كنا بنقول عليها
بلد الامن والامان شكلى هغير رائى قريب اذا كنت مغيرتهوش يعنى
شكرا غادة وتحياتى ليكى ولدكتور حمادة منورنا بردودك ووجودك معانا

العفو ساد هيرت
وفعلا اكيد دا سببه عقده نفسيه ذي مقولتي
واللي هيا سببها اصلا ارتفاع الاسعار والغلاء
وارتفاع تكاليف الزواج ووجود البطاله في البلد
وان الشباب مش عارفه تتجوز ومش لاقيه شغل
كويس وطبعا دا كله سببه الحكومه بتاعتنا
والفساد اللي منتشر في البلد
بس المفروض فعلا تبقي في عقوبات علي كدا او غرامات يعني
عشان يبقي في امان شويه او يحاولو يلاقو اي حل للمشكله دي
مثلا تبقي في اتوبيسات مخصصه للرجال واتوبيسات مخصصه للسيدات لوحدهم
ويبقي مكتوب عليها مخصص للسيدات فقط او مخصص للرجال فقط وكدا يعني
ومش مهم لو كانت هتبقي زحمه يعني
المهم انها تبقي في امان لما الست تركب جنب ست زيها
والرجاله يركبو مع بعض
اكيد هيبقي في احساس بنوع من الامان الي حد ما
شكرا ساد هيرت ع المرور والتعليق الجميل اوي دا
ومنوره المنتدي دايما بردودك وتعليقاتك القيمه
وشكرا دكتور حماده ع التعليق الجميل والتواصل معانا

هههههههههههههههههه
اللهم اهدينا جميعا

اللهم اهدي شباب المسلمين والمسلمات

» أتوبيس الدنيا
» يوميات صرصور
» يوميات كسلان النعسان - صور
» يوميات تعبان جائع
» يوميات ذبابه طفشانه